काठमाडौं चैत २९ । नेपाल जेसिजका राष्ट्रिय अध्यक्ष जगतबहादुर पोखरेल उमेर विवादमा तानिएका छन् । बिभिन्न निकायमा प्रयोग गरिएका कागजात, कन्फ्रेन्स भिषा र दुई भिन्न–भिन्न नागरिकतामा फरक–फरक उमेर पाइएपछि उनको नागरिकतामा उमेर बिबाद देखिएको हो ।

अमेरिकी दूतावास काठमाडौंबाट प्राप्त गरेको कन्फ्रेन्स भिषाको कागजातमा पोखरेलको उमेर १ भदौ २०३२ अर्थात १७ अगष्ट १९७५ उल्लेख छ । उनले नोटरी पब्लिकबाट प्रमाणीत गराएको २०१५ को भोट लिष्टको कागजातमा पनि उमेर ३२ बर्ष नै उल्लेख छ । यसैगरि जिल्ला प्रशासन पाल्पाबाट २९ डिसेम्बर २०१५ मा उनले प्रमाणित गराएको नागरिकताको अंग्रेजी कागजातमा पनि उनको उमेर १ भदौ २०३२ नै छ ।

तर, उनले १५ जेठ २०५० मा जिल्ला प्रशासन पाल्पाबाटै लिएको ४१३८९ नम्बरको नागरिकतामा भने उमेर १ भदौ २०३३ उल्लेख छ । २०५० को नागरिकता कामु प्रजिअ दुर्गानाथ गौतमले जारी गरेका छन । पोखरेलको २०५० मा जारी भएकै नागरिताको अर्को फोटो कपीमा भने उनको जन्म मिति २०३२ लेखिएको छ । यद्यपी पोखरेलेको नागरिकता नम्बर भने सबै कागजातहरुमा एउटै उल्लेख छ ।

नेपाल जेसिजको अध्यक्ष हुनका लागि पोखरेलले मिलेमतोमा नागरिकताको उमेर हेरफेर गराएको आरोप लागेको छ । जेसिजको नियम अनुसार १८ देखी ४० बर्ष उमेरसम्म मात्र युवा सदस्य हुन्छन् । जेसिजको नियम अनुसार ४० बर्ष नाघेका युवाले जिम्मेबार पदमा उम्मेद्वारी दिन पाउँदैनन् ।

नागरिकता ऐन अनुसार यसरी नागरिकतामा नाम, ठेगाना, उमेर आदि जानाजान घटबढ गर्नु सरकारी कागजात किर्ते कसुर गरेको ठहर्छ । अध्यक्ष पोखरेलको नागरिकता बिबाद भ्रम हो वा बास्तबिक रुपमै किर्ते हो छानबिन हुन आवश्यक भएको जेसिजका सदस्य बताउँछन् । एक बर्ष मात्रै पदावधि हुने अध्यक्ष पदको निर्बाचन हरेक बर्षको अन्तिम महिना डिसेम्बर महिनामा हुने गर्दछ । पोखरेले यसै डिसेम्बरको निर्बाचनबाट नेपाल जेसिजको राष्ट्रिय अध्यक्ष बनेका हुन ।

अध्यक्ष पोखरेलले आफनो नागरिकतामा कुनै बिबाद नभएको तर बिरोधीले कपोलकल्पित प्रोपोगण्डा गर्न खोजेको आरोप लगाए । भने, ‘यो सबै चुनावको रियाक्सन हो,अरु केही हैन, म गलत छैन ।’